Mtoto achomwa mikono akidaiwa kuiba Sh7,000

Akizungumza  na waandishi wa  habari waliofika katika Hospitali  ya  Kinyonga  wilayani  Kilwa jana (Ijumaa) alipolazwa mtoto huyo, mama yake alisema  kuwa alichukua  uamuzi  wa kumchoma  moto mtoto huyo kutokana  na kuchoshwa  na  tabia  yake ya  wizi na mashtaka  ya  kuwa na tabia ya  udokozi  wa  mara kwa  mara.

Kilwa. Mtoto Razaki  Ali  (9) wa Kijiji cha Miramba  wilayani Kilwa mkoani Lindi amechomwa moto mikononi na mama yake mzazi,  Zabibu  Binamu  kwa  madai ya kuiba Sh7,000.

Akizungumza  na waandishi wa  habari waliofika katika Hospitali  ya  Kinyonga  wilayani  Kilwa jana (Ijumaa) alipolazwa mtoto huyo, mama yake alisema  kuwa alichukua  uamuzi  wa kumchoma  moto mtoto huyo kutokana  na kuchoshwa  na  tabia  yake ya  wizi na mashtaka  ya  kuwa na tabia ya  udokozi  wa  mara kwa  mara.

Zabibu alisema alimchoma moto mikononi mtoto huyo baada ya kuiba Sh7, 000. 

“Jamani  naomba niwaeleze kisa na mkasa kwa ujumla mtoto huyo amekuwa  na  tabia  ya wizi  na  udokozi wa  mara  nyingi  hivyo  niliamua kumchoma  ili kukomesha  tabia  hiyo,” alisema  zabibu.

Zabibu alisema baada ya   kumchoma moto hakumkupeleka  hospitali  na badala yake alimpaka asali.

Mganga  Mfawidhi wa Hospitali  ya Kinyonga  Wilaya ya Kilwa, Saleh Abubakari  alisema mtoto huyo ameungua vibaya na hata akipona huenda akawa mlemavu.

Kamanda wa Polisi  mkoani  hapa, Renata  Mzinga alikiri kuwapo kwa tukio hilo na  kueleza kuwa  mama amemchoma moto mwanaye kwa kumfunga na majani makavu na  kumsababishia  maumivu na  majeraha  mikononi.

“Mama wa mtoto anashikiliwa na jeshi, lakini  kwa sasa yuko  nje  kwa  dhamana na   taratibu nyingine za kisheria zinaendelea,” amesema.

Mwanaharusi Hamisi Kumala jirani wa mtoto huyo alisema  siku  ya  tukio  Razaki alikimbilia kwake kuomba msaada baada ya mama  yake  kumchoma moto  kwa  madai  ya  kuiba  fedha hizo.

Mwenyekiti  wa  Jukwaa la  Wanawake  Wilaya ya  Kilwa, Tumainieli Mpunga   ameiomba Serikali kuwachukulia hatua za kisheria  wazazi  na walezi wenye tabia ya ukatili dhidi ya  watoto.