Kiongozi mwingine wa ACT-Wazalendo ang’oka

 

Kwa ufupi

Akizungumza na gazeti LA mwananchi kwa njia ya simu leo, (Jumamosi) Longopa,   amesema haoni sababu ya kuendelea kuwa kiongozi wa chama hicho kwani kitampa wakati mgumu kuhamasisha wanachama wapya katika Uchaguzi Mkuu mwaka 2020.

Mbeya. Katibu wa Chama  ACT-Wazalendo Mkoa wa Mbeya, Bahati Longopa ametangaza kuachia wadhifa  huo kwa kile alichodai kutoridhishwa na kitendo cha  kuteuliwa aliyekuwa Mwenyekiti wa chama hicho, Anna Mghwira kuwa Mkuu wa Mkoa wa Kilimanjaro  na kuitumikia Serikali ya Awamu ya Tano.
Akizungumza na gazeti hili kwa njia ya simu leo, (Jumamosi) Longopa,   amesema haoni sababu ya kuendelea kuwa kiongozi wa chama hicho kwani kitampa wakati mgumu kuhamasisha wanachama wapya katika Uchaguzi Mkuu mwaka 2020.
"Nimeamua kwa hiari yangu kuacha nafasi ndani ya chama kwani ukiona viongozi wa juu  wanateuliwa  kuingia katika Serikali iliyopo madarakani  inayoongozwa na chama pinzani,  sisi wa ngazi za chini tutapata wapi sauti ya kushawishi wanachama wapya kujiunga na ACT-Wazalendo,"amesema.

Kuhusu kujiunga na chama  kingine cha siasa amesema kwa sasa ni mapema mno kuzungumzia hilo kwani   ataendelea kukaa pembeni na kutojihususisha kwenye mambo ya siasa  huku akitafakari nini cha kufanya.
Mwenyekiti wa ACT- Wazalendo,   Wilaya ya Mbeya, Ally Mbika alisema wamepata taarifa  za chini chini, lakini kama chama bado hawajakabidhiwa barua yoyote kutoka kwa kada huyo kutamka kujiuzulu rasmi.

Amesema  wanasubiri  kukabidhiwa  rasmi ili kuweza kulizungumzia kwa vyombo vya habari barua na  viongozi wa chama  watapitia katiba yao na kupata mwongozo na kuangalia namna ya  kuziba nafasi hiyo mpaka Uchaguzi  Mkuu  wa  mwaka 2020.

Mbika amesema kuwa kujiengua kwa kada huyo ni pigo kwa chama kwani alikuwa ana mchango mkubwa wa ushawishi na kujenga umoja na mshikamano wa kweli wa ndani na nje ya mkoa.