WATATU SIMBA KUIKOSA MTIBWA SUGAR (VPL)

WATATU SIMBA KUIKOSA MTIBWA SUGAR (VPL)

Kuelekea mchezo wa Ligi Kuu Tanzania Bara Jumatatu ya wiki ijayo, Vinara wa ligi hiyo  Simba Sc itawakosa nyota wake watatu ambao wamekuwa sehemu ya kikosi cha kwanza.

Simba itawakosa Juuko Murushid, James Kotei na Erasto Nyoni ambao wamefikisha idadi ya kadi tatu za njano katika msimu huu wa ligi kuu bara.

Kwa mujibu wa sheria za soka, mchezaji anapofikisha idadi ya kadi hizo tatu, hawezi kuruhusiwa kucheza mchezo mmoja unaofuatia.

Wachezaji hao walipata kadi za njano kila mmoja katika mchezo uliopita dhidi ya Njombe Mji ambao Simba walishinda kwa jumla ya mabao 2-0, yaliyofungwa na nahodha John Bocco.

Kikosi hicho kimeweka kambi mjini Iringa hivi sasa kwa ajili ya maandalizi ya mchezo wa ligi dhidi ya Mtibwa Sugar, mchezo huo unatarajiwa kupigwa  Jumatatu ijayo ya April 09 mwaka huu kwenye uwanja wa Jamhuri kuanzia saa 16:00 jioni.